TTCL KUSHIRIKIANA NA TIGO HUDUMA ZA KIFEDHA MTANDAONI.

 Mkuu wa Kitengo cha TTCL Pesa kutoka Shirika la Mawasiliano Tanzania (TTCL) Bw. Moses Alphonce akiwa upande wa kulia wakipongezana na Afisa Mkuu wa Kitengo cha Huduma ya Fedha Tigo Bw. Hussein Sayed  ikiwa ni ishara ya uzinduzi rasmi wa huduma za kifedha kwa njia ya mtandao kati ya TTCLPesa na Tigo Pesa , hafla hiyo imefanyika leo jijini Dar es Salaam.

WINGU LA HABARI

NOEL RUKANUGA, DAR ES SALAAM.

Shirika la Mawasiliano Tanzania (TTCL) limeingia makubaliano ya ushirikiano wa biashara na Kampuni  ya Simu za mikononi ya Tigo Tanzania yatakayowezesha wateja wa taasisi hizo kubadilishana fedha na huduma za fedha kupitia simu zao za mkononi.

Akizungumza na waandishi wa habari leo jijini Dar es Salaam katika ghafla ya kutangaza ushirikiano huo, Mkuu wa Huduma za TTCL Pesa Bw. Moses Alphonce,  amesema  wamefanya hivyo ili kuhakikisha wanawapa wananchi huduma bora ya fedha mitandaoni pamoja na kuunga mkono jitihada za serikali.

Bw. Alphone amesema kuwa ushirikiana na tigo pesa na TTCL Pesa umelenga kuwapa wananchi suluhisho sahihi la mahitaji yao ya kifedha ikiwa ni kuunga mkono jitihada za serikali ya awamu ya tano za kusogeza huduma karibu zaidi na watanzania.

“TTCL imeazimia kuwapa wananchi huduma za kiwango cha juu na cha ubora na unafuu wa gharama za kupokea na kufanya miamala kwa kutumia simu zao pamoja na kuongeza usalama na ufanisi wa shughuli za kiuchumi na kijamii.” amesema  Bw. Alphonce. 

Ameeleza kuwa TTCL Pesa inaendelea kujivunia uwezo wa hali ya juu katika kutoa huduma bora na nafuu pamoja na kujidhatiti katika kutoa huduma kwa haraka na usalama wa hali ya juu wa fedha za wateja.

Hatua hiyo ni mwendelezo wa jitihada za Shilika la  Mawasiliano Tanzania ili kuhakikisha inaongoza katika kutoa huduma bora katika soko la huduma la mawasiliano hapa nchini.

“TTCL imeendelea kuwa mhimili Mkuu wa Mawasiliano hapa nchini katika kutoa huduma za za data kwa taasisi za umma na binafsi  pamoja na huduma za simu za mezani na viganjani” amesema Bw. Alphonce. 

Akizungumzia makubaliano hayo ya kibiashara Mkuu wa Huduma za Tigo pesa Bw. Hussein Saidi, amesema kuwa Tigo pesa imeendelea kufikisha huduma sehemu mbalimbali ambazo huduma za kifedha hazipatikani ili kuwawezesha watu kufanya huduma zao kutoka tigo kwenda TTCL Pesa.

Hata hivyo hatua hii ya makubaliano kati ya TTCL na Tigo ni muendelezo wa jitihada za shirika la Mawasiliano Tanzania kurejea kwa kishindo katika soko huduma za mawasiliano nchini, kwani hadi sasa TTCL imefanikiwa kufikisha huduma za 4G lite kutoka mikoa 16 ya Tanzania bara na Visiwa vya Pemba na Unguja.