WARAMI WAWAONYA MAASKOFU, WANASIASA.

Mkurugenzi wa Utafiti wa Watetezi wa Rasilimali Wasio na Mipaka (WARAMI ) Phillipo Mwakibinga akizungumza na waandishi wa habari leo jijini Dar es Salaam.

Waandishi wa habari wakiwa katika mkutano na Mkurugenzi wa Utafiti WARAMI Phillipo Mwakibinga jijini Dar es Salaam.

WINGU LA HABARI

NA NOEL RUKANUGA, DAR ES SALAAM

Watetezi wa Rasilimali Wasio na Mipaka (WARAMI) wamewataka baadhi ya viongozi wa dini, siasa pamoja na wanaharakati kuheshimu sheria za nchini ikiwemo kuto ingilia uhuru wa mahakama kwa kutoa kauli za kushinikiza juu jambo fulani.

Akizungumza na waandishi wa habari leo jijini Dar es Salaam Mkurugenzi wa Utafiti WARAMI Phillipo Mwakibinga, amesema kuwa baadhi ya viongozi wa vyama vya siasa wamekuwa kiendesha vyama hivyo bila kufata misingi ya sheria.

Amesema kuwa hivi karibu viongozi wa Chama cha Demokrasia na Maendeleo (CHADEMA) wamekuwa wakitoa kauli ya kushinikiza mahakama kwa kuwapa dhamana viongozi wao wa juu.

Mwakibinga amesema kuwa viongozi wa siasa wamekuwa wakitoa kauli hiyo, huku wakijua mahakama ni chombo cha haki ambacho akipaswi kuingiliwa na mtu yoyote kwa mujibu wa sheria.

“Kumekuwa na kauli ambazo moja kwa moja zimelenga kuishawishi, kuishinikiza na kuilazimiisha mahakama ifanye watakavyo wao kwa kuacha misingi ya haki wajibu na maadili ya kimahakama”amesema Mwakibinga.

Ameeleza kuwa watanzania wanapaswa kujua sheria ni kama ‘Kaa la moto’ na inapotokea mtu umevunja sheriza lazima ujiandae kuungua.

Amesema kuwa wakati umefika wa viongozi wa siasa kuacha kuongea maneno ambayo sio rafiki katika jamii na kusababisha kuharibu sifa za vyombo vya kiusalama kwa kuongea vitu vya ajabu.

Katika hatua nyengine amewataka viongozi wa dini wakiwemo maaskofu’ wanaotumika na vyama vya siasa kuacha tabia hiyo na badala yake kufanya kazi ya mungu.

Hata hivyo Mwakibinga amesema kuwa WARAMI hawapo tayari kutoka katika msingi ya kuitetea jamii kwa mslahi ya taifa.