SERIKALI YAJIANDAA KUMWAGA AJIRA BOMBA LA MAFUTA.

Kaimu Mkurugenzi Mtendaji Wakala wa Huduma za Ajira Tanzania (TaESA) Boniface Chandaruba akiwaonyesha waandishi wa habari fomu maalum ya usajili leo jijini Dar es Salaam.

WINGU LA HABARI

NA NOEL RUKANUGA, DAR ES SALAAM.

Serikali imeawataka watanzania wenye taaluma na ujuzi katika sekta ya Mafuta na Gesi kuchangamkia fursa za ajira zaidi ya 1,000 zinazotokana na mradi wa bomba la mafuta.

Akizungumza na waandishi wa habari leo jijini Dar es Salaaam Kaimu Mkurugenzi Mtendaji Wakala wa Huduma za Ajira Tanzania (TaESA) Boniface Chandaruba, amesema kuwa watanzania wote wenye sifa wanapaswa kujisajili TaESA ili waweze kuingizwa kwenye kanzidata ya wakala.

Amesema kuwa kufanya hivyo itasaidia serikali kubaini idadi halisi ya watanzania walio na sifa zinazohitajika na walio tayari kuajiriwa kwenye mradi wa bomba la mafuta.

“Zoezi hili la usajili linafanyika bure hivyo, tunasisitiza kuwa hakuna gharama yoyote itakayotozwa kwa mtanzania yeyote atakayehitaji kusajiliwa” amesema Chandaruba.

Chandaruba amefafanua kuwa zoezi la usajili linafanyika kwa kujaza fomu maalum inayopatikana kupitia tovuti ya wakala www.taesa.go.tz au muhusika anaweza kufika katika ofisi za kanda zilizopo Mkoa wa Dar es Salaam, Arusha, Dodoma pamoja na Mwanza.

Mradi wa ujenzi wa bomba la mafuta la kusafirisha mafuta Ghafi ‘East Africa Crude Oil Pipeline’ (EACOP) kutoka Hoima nchini Uganda hadi Changoleani mkoani Tanga nchini Tanzania.

Mradi wa bomba la mafuta ni mradi mkubwa kutekelezwa hapa nchini ambao unategemea kugharimu dola za kimarekani bilioni 3.5 ambapo sawa na trillion 8 zitanzania.

Bomba hilo linategemea kuwa na urefu wa kilometa 1,445, huku  ujenzi wa kilometa 1, 115 za bomba hilo utafanyika nchini  ambapo jumla ya Mikoa 8, Wilaya 24, Vijiji 184 hapa nchini vinategemea kupitiwa na bomba hilo.

Mradi wa ujezi huo unatarajia kuchukua kati ya miezi 24 hadi 36 hadi kumalizika ambapo unatarajia kuzalisha fursa za ajira takribani 10,000 wakati wa ujenzi na ajira zaidi ya 1,000 wakati wa uendeshaji wake.