TRA WATOA NENO TAASISI ZA DINI, ASKOFU KAKOBE AOMBA RADHI KWA JPM.

 Waandishi wa habari wakiwa katika Mkutano na Kamishna Mkuu wa  Mamlaka ya Mapato Tanzania (TRA) Bw. Charles Kichere leo Jijini Dar es Salaam.

Kamishna Mkuu wa  Mamlaka ya Mapato Tanzania (TRA) Bw. Charles Kichere akizungumza na waandishi wa habari leo jijini Dar es Salaam kuhusu sakata la  Askofu Zachary Kakobe Kanisa la Full Gospel Bible Fellowship kufuatia kauli yake kuwa  “Yeye ana pesa kuliko Serikali" kutoka kulia ni Mkurugenzi wa Huduma na Elimu kwa Walipa Kodi Richard Kayombo.

WINGU LA HABARI

NA NOEL RUKANUGA, DAR ES SALAAM

Taasisi za dini nchini zimetakiwa kufata katiba zao pamoja na kulipa kodi stahiki kwa wakati kupitia shughuli za kiuchumi wanazofanya ili kuepuka kuvunja  sheria, kanuni na taratibu za kodi.

Hayo yamesema leo na Kamishna Mkuu wa Mamlaka ya Mapato (TRA) Charles Kichere, wakati akitoa taarifa ya uchunguzi kuhusu kauli ya Askofu Zachary Kakobe ambapo alisema ‘Yeye ana pesa kuliko Serikali’.

Kamishna Kichele amesema kuwa Askofu Kakobe hana akaunti katika taasisi yoyote ya fedha hapa nchini, huku akieleza kuwa kanisa hilo limekuwa likikwepa kulipa kodi kutokana fedha walizowekeza katika makapuni ya kukuza mitaji.

Amesema baada ya uchunguzi huo kanisa lilipa kiasi cha kodi cha sh milioni 20,834,843 ambazo zilitokana na uwekezaji katika makampuni ya kukuza mitaji.

“Taasisi za dini zote ambazo zinajihusisha na shughuli zozote za kiuchumi zinapaswa kulipa kodi stahiki na kwa wakati na kufata sheria ili kuepuka usumbufu” amesema Kichere.

Ameeleza kuwa Kampuni inayomilikiwa na watoto wa Askofu Zachary Kakobe pia ilikwepa kulipa kodi kiasi cha shilingi 37,280,030.00 ambazo nazo zimelipwa baada ya uchunguzi.

Amefafanua kuwa baada ya uchunguzi huo Mamlaka ya mapato Tanzania (TRA) imebaini mambo kadhaa kutokana na kufanyika kwa uchunguzi huo.

Amesema kuwa uchunguzi ulibaini kuwa Askofu Kakobe ni mmoja wa wasimamizi wakuu wa akaunti za kanisa (Signatories) zilizopo katika benki ya NBC zenye jumla ya kiasi cha shilingi 8,132,100,819.00, amapo kiasi hicho cha fedha kimetokana na sadaka, zaka na changizo ambazo zinatolewa na waumini wa kanisa hilo.

Kamishna Kichere amesema Kanisa  hilo linatunza kiasi kikubwa cha fedha kwenye ndoo na ‘majaba’ ambapo ni kinyume na taratibu za utunzaji wa fedha, lakini uwekaji na utoaji wa fedha nyingi kutoka benki haushirikishi vyombo vya ulinzi na usalama kwa ajili ya usalama wa fedha zenyewe na wahusika.

Amesema kuwa kanisa halitengenezi hesabu za Mapato na Matumizi ya fedha kitu ambacho ni kinyume na katiba ya kanisa pamoja na sheria za usimamizi wa fedha.

"Natoa wito kwa taasisi zote za dini ambazo zinajihusisha na shughuli yoyote za kiuchumi kulipa kodi stahiki na kwa wakati kwa mujibu wa sheria, kanuni na taratibu za kodi" amesema Kamishna Kichere.

Katika hatua nyengine Kamishna Kichere amebainisha kuwa Askofu Kakobe januari 24 mwaka huu, aliandika barua kwa Mheshimiwa Rais wa Jamhuri ya Muungano wa Tanzania Dk. John Pombe Magufuli  na kuomba radhi kutokana na kauli yake ya kebehi pamoja na matamshi yake ya dharau kwamba ana pesa nyingi kuliko Serikali.

 Askofu Zachary Kakobe wakati akiendesha ibada katika Kanisa la Full Gospel Bible Fellowship katika mahubiri aliyotoa kwenye Ibada hiyo  akisema  “Yeye ana pesa kuliko Serikali ya Jamhuri ya Muungano wa Tanzania”.