WATU ZAIDIYA 717 WAFARIKI KATIKA MJI WA KIISLAM MECCA

Zaidi ya watu 717 waliokuwa wakishiriki sherehe za hija wamefariki baada kutokea mkanyagano karibu na mji wa mtakatifu wa Kiislamu wa Mecca.

Idara ya ulinzi wa raia nchini Saudi Arabia imesema kuwa watu wengine 863 wamejeruhiwa katika kisa hicho kilichotokea eneo la Mina, takriban kilomita tano kutoka mji wa Mecca.

Maafa hayo yalitokea mahujaji takriban milioni mbili walipokuwa wakishiriki moja ya kaida muhimu za mwisho katika ibada za hija.

Huu ni mkasa mbaya zaidi kutokea wakati wa hija katika kipindi cha miaka 25.

Mahujaji husafiri hadi Mina wakati wa kuhiji kurusha mawe saba kwenye nguzo saba zijulikanazo kama Jamarat, ambazo huwakilisha shetani.

Nguzo hizo zimo katika eneo ambalo inaaminika Nabii Ibrahim alijaribiwa na shetani.

Watu walikuwa wakielekea eneo la kurushia mawe, na wengine wakitokea huko na pale ghafla watu walipoanza kuanguka.

Kulikuwa na raia wa Nigeria, Niger, Chad na Senegal miongoni mwa mataifa mengine.

Idara ya ulinzi wa raia Saudi Arabia imesema mkanyagano huo ulitokea pale kulipotokea ongezeko la ghafla la watu waliokuwa wakielekea  kwenye nguzo za kurushiwa mawe.

Waziri wa afya wa Saudi Arabia Khaled al-Falih amesema mkanyagano huo ulitokea kwa sababu mahujaji walikosa kufuata maagizo.

"Wengi wa wahamiaji huenda bila kufuata ratiba iliyowekwa," alisema.

Hata hivyo Idara ya ulinzi wa raia Saudi Arabia imesema maafisa 4,000 wametumwa eneo hilo kusaidia pamoja na wahudumu 200 wa huduma za dharura.

Maandalizi ya ibada hizo za hija yalikuwa yamekumbwa na mkasa baada ya kreni kuanguka katika msikiti mkuu wa Mecca mwezi huu na kuua watu 109,hii si mara ya kwanza kwa mikasa kutokea wakati wa hija.

Mikasa mingine iliyotokea wakati wa kuhiji:

2006: Mahujaji 364 walifariki wakati wa kurushia mawe mnara unaoashiria shetani

1997: Mahujaji 343 walifariki na 1,500 kujeruhiwa kwenye mkasa wa moto

1994: 270 waliuawa katika mkanyagano

1990: Mahujaji 1,426 waliuawa katika mkanyagano njia za kupitia chini za kuelekea maeneo matakatifu

1987: Watu 400 walifariki maafisa wa serikali walipokabiliana na waandamanaji waliounga mkono Iran.

Chanzo BBC.