WANAMITINDO WAFANYA UZINDUZI WA CHAMA, BASATA WATOA NENO.

 Mwanzilishi wa Chama cha Wanamitindo Tanzania (FAT), Mustafa Hassanali (wa pili kutoka kulia) akizungumza na waandishi wa habari katika uzinduzi wa chama hicho leo jijini Dar es Salaam 

 Katibu Mtendaji Baraza la Sanaa la Taifa (BASATA) Godfrey Ngereza akizindua chama FAT leo jijini Dar es Salaam.

Wanzilishi wa Chama cha FAT Asia Idarous (wa kwanza kutoka kushoto) akiongea na waandishi wa habari, wengine waliosimama ni wanamitindo mbalimbali wakiwa katika picha ya pamoja.

WINGU LA HABARI

NA NOEL RUKANUGA, DAR ES SALAAM.

Wanamitindo nchini wametakiwa kujiunga katika chama chao jambo ambalo linaweza kuleta chachu ya maendeleo katika kufanikisha Tanzania ya Viwanda kupitia ubunifu wao.

Akizungumza na waandishi wa habari leo jijini Dar es salaam katika uzinduzi wa Chama cha Wanamitindo Tanzania (FAT), Mustafa Hassanali  amesema lengo la chama ni kuendeleza maslahi ya sekta ya mitindo kwa kuwaunganisha na kugawana ujuzi, uzoefu na rasilimali katika sekta hiyo.

“FAT pia imelenga kukuza na kuimarisha sekta ya mitindo nchini. Sisi kama wabunifu tunaunga mkono juhudi za rais Magufuli katika kuifanya nchi kuwa katika uchumi wa viwanda vya kati ifikapo 2025 kwa kuongoza katika bidhaa za nguo na vitambaa zinazotoka Tanzania,” amesema Hassanali.

Ameongeza sekta ya mitindo inakuwa kwa haraka huku   wadau wake wanakumbana na changamoto nyingi, lakini bado wanaendelea kutafuta mafanikio kwa kuanzishwa chama hicho chenye nia ya kuimarisha uhusiano mzuri wa wafanyaji kazi za mitindo.

Mama wa Mitindo na Mwanzilishi wa Lady In Red nchini Asia Idarous, amesema chama hicho hakijaundwa kwa ajili ya wabunifu tu bali hata kwa wadau wote wa sekta ya mitindo, majukwaa mbalimbali ya mitindo, taasisi za mitindo, wanamitindo (models) na wanamitindo wanaopanga mavazi (Stylish).

Asia Idarous amesema kuwa watu wote wa sekta ya mitindo na majukwaa mbalimbali, taasisi za mitindo wapaswa kujiunga katika chama hicho.

Idarous ameeleza kuwa wadau wengine katika chama hicho ni wanamitindo wanaopanga muonekano wa mavazi (stylist), wapiga picha wa mtindo, makampuni ya nguo, wazalishaji na wauzaji mavazi na wanaojihusisha na kazi za mitindo na urembo.

Hata hivyo amewataka wafanyakazi katika sekta ya mitindo hapa nchini kujiunga katika chama hicho ili kupaza sauti zao katika kutafuta fursa mpya za mitindo pamoja na kutatua changamoto zinazowakabili katika tasnia ya mitindo.

Katibu Mtendaji Baraza la Sanaa la Taifa (BASATA) Godfrey Ngereza, amesema kuwa ni hatua nzuri wanaofanya wanamitindo kwani ni sehemu ya mafanikio katika kupiga hatua.

Amesema kuwa ni wakati umefika wanamitindo kuwa na upmoja hasa katika kipindi hiki taifa lipo katika ujenzi wa viwanda kwa ajili kufika uchumi wa kati.

“Wabunifu ni watu wa muhimu katika kuhakikisha wanatumia ubunifu wao kwa ajili ya kufanikisha Tanzania ya viwanda” amesema Ngereza.

Amefafanua kuwa chama cha wanamitindo kwa sasa watafika mbali katika kufanikisha kazi zao na kufanya vizuri ndani na nje ya Tanzania.

Hata hivyo Ngereza ameeleza kuwa wataendelea na mipango ya kukufua vipaji vya watoto kuanzia ngazi ya shule ya msingi hadi sekondari, kwani kufanya hivyo itasaidia kuleta chachu ya maendeleo katika kukuza vipaji.