MKURUGENZI BUTIAMA ATUMBULIWA, MUWEKA FEDHA MATATANI

WINGU LA HABARI

NA NOEL RUKANUGA, DAR ES SALAAM

Waziri wa Nchi, Ofisi ya Rais Tawala za Mikoa na Serikali za Mitaa (TAMISEMI) Mhe. Selemani Jafo akizungumza na waandishi wa habari leo jijini Dar es Salaam.

 Waziri wa Nchi, Ofisi ya Rais Tawala za Mikoa na Serikali za Mitaa (TAMISEMI) Mhe. Selemani Jafo

Rais wa Jamhuri wa Muungano wa Tanzania Dkt. John Pombe Magufuli ametengua uteuzi wa Mkurugenzi wa Halmashauri ya Wilaya ya Butiama Mkoani Mara baada ya kushidwa kusimamia vyema majukumu yake.

Akizungumza na waandishi wa habari leo Waziri wa Nchi, Ofisi ya Rais Tawala za Mikoa na Serikali za Mitaa (TAMISEMI) Mhe. Selemani Jafo amesema kuwa Mkurugenzi huyo ni Solomon Ngiliule ambaye uteuzi wake umetenguliwa kuanzia sasa.

Amefafanua kuwa baada ya kutenguliwa uteuzi huo,  Katibu Mkuu, Ofisi ya Rais- TAMISEMI anapaswa kuchukua hatua stahiki kwa Mweke Hazina aliyekuwepo wakati matumizi mabaya ya fedha za serikali zinafanyika katika halmashauri hiyo.

“Katibu Mkuu anatakiwa kumchukulia hatua stahiki Mweka Hazina ambaye alikuwepo wakatika Mkurugenzi anafanya matumizi mabaya ya fedha za serikali” amesema Mhe. Jafo.

Mhe. Jafo ameeleza kuwa kwa sasa Taasisi ya Kuzuia na Kupambana na Rushwa (TAKUKURU) wanaendelea na uchunguzi ili kubaini kiasi gani cha fedha kilichotumia vibaya.

Hata hivyo amewataka  watendaji wote walio chini ya Tawala za Mikoa na Mamlaka za Serikali za Mitaa kufanya kazi kwa weledi na kuzingatia kanuni za utumishi wa umma na kuhakikisha rasilimli  za umma na nchi zinatumika kwa mslahi ya wananchi.

Kutumbuliwa kwa Mkurugenzi wa Halmashauri ya Wilaya ya Butiama Solomon Ngiliule kumetokana na ziara ya kikazi iliyofanywa na Waziri Mkuu wa Jamhuri ya Muungano wa Tanzania Mhe. Kassim Majaliwa ambapo ilibainika watendaji wa halmshauri wameshindwa kusimamia vyema maeneo yao kazi.