UFAULU MTHIANI WA ELIMU YA MSINGI WAONGEZEKA, ASILIMIA 98 WAJIUNGA KIDATO CHA KWANZA.

Waziri wa Nchi Ofisi ya Rais Tawala za Mikoa na Serikali za Mitaa Mhe. Seleman Jafo akifafanua jambo wakati akiongea na waaandishi wa habari katika ukumbi wa mikutano wa Tamisemi mjini Dodoma.

Zaidi ya asilimia 98 ya wanafunzi wamechaguliwa kujiunga na masomo ya kidato cha kwanza katika awamu ya kwanza mwaka 2018 kati ya wanafunzi 650,862 waliofanya mthiani wa kumaliza elimu ya msingi kwa mwaka huu.

Akitangaza matokeo hayo mjini Dodoma kwa upande wa Tanzania Bara waziri wa nchi ofisi ya rais tawala za mikoa na serikali za mitaa Seleman Jafo, amesema kuwa idadi wa wanafunzi mwaka huu imeongezeka.

“Wanafunzi 124,209 na ni sawa na asilimia 23.58 ikilinganishwa na wanafunzi 526,653 waliochaguliwa awamu ya kwanza kuingia kidato cha kwanza mwaka 2016,” amesema.

Amesema kuwa wanafunzi 1912 wenye uhitaji maalum (pupils with special needs) waliofaulu mitihani ya darasa la saba wamechaguliwa kujiunga na masomo ya kidato cha kwanza mwaka 2018 kwenye shule za sekondari za Serikali.

Jafo amefafanua kuwa wanafunzi 11,173 sawa na asilimia 1.69 ya waliofaulu hawakupata nafasi ya kuchaguliwa kujiunga na kidato cha kwanza katika awamu ya kwanza ya uchaguzi kutokana na uhaba wa miundombinu ya elimu hususani vyumba vya madarasa kwenye baadhi ya halmashauri ya Mikoa ya Lindi (170), Mbeya (3,092), Rukwa (4,091), Manyara (1,268), Katavi (976) na Simiyu (1,576).