MFUMUKO WA BEI UMEPUNGUA KWA ASILIMIA 0.7

Mkurugenzi wa Sensa ya Watu na Takwimu za Jamii, Ephraim Kwesigabo kutoka Ofisi ya Taifa ya Takwimu (NBS)

WINGU LA HABARI

Na Noel Rukanuga.

Mfumo wa bei wa taifa kwa mwezi Novemba mwaka huu umepungua kutoka asilimia 5.1 katika mwezi Oktoba hadi kufika asilimia 4.4.

Akizungumza na waandishi wa habari leo jijini Dar es Salaam, Mkurugenzi wa Sensa ya Watu na Takwimu za Jamii, Ephraim Kwesigabo kutoka Ofisi ya Taifa ya Takwimu (NBS) amesema kuwa hali hiyo inamaanisha kuwa kasi ya mabadiliko ya bei za bidhaa na huduma kwa mwaka ulioishia mwezi novemba mwaka huu imepungua ikilinganisha na kasi ilivyokuwa  kwa mwaka ulioishia mwezi oktoba mwaka  huu.

“Kupungua huko imetokana na mfumuko wa bei wa taifa unapima kiwango cha kasi ya mabadiliko ya bei ya bidhaa pamoja na huduma zote zinazotumiwa na kaya binafsi hapa nchini’’ Kwesigabo

Ameeleza kuwa kupungua kwa mfumuko wa bei kumechangiwa na kupungua kwa bei za baadhi ya bidhaa za vyakula kwa kipindi kilichoishia mwezi novemba mwaka huu zikilinganishwa na bei za mwezi novemba mwaka wa jana.

Amefafanua kuwa baadhi za vyakula zilizochangia kupungua kwa mfumuko wa bei ni pamoja na nyama ya ngombe kwa asilimia 5.4, samaki wabichi asilimia 22.2, mbogamboga kwa asilimia 3.9, viazi mviringo kwa asilimia 14, mihogo mibichi kwa asilimia 24.8 pamoja na viazi vitamu kwa asilimia 13.4.

Hata hivyo mfumuko wa bei nchini Tanzania una mwelekeo unaofafana na  baadhi ya  nchi nyengine za Afrika Mashariki ambapo katika nchi ya Kenya mfumuko wa bei kwa mwezi novemba mwaka huu umepungua hadi kufikia asilimia 4.73 kutoka  asilimia 5.72.

Nchini Uganda mfumuko wa bei umepungua na kufikia asilimia 4 mwezi novemba mwaka huu kutoka asilimia 4.8 kwa mwezi Oktoba mwaka huu.