MFUMUKO WA BEI WAONGEZEKA

Mkurugenzi wa Sensa ya Watu na Takwimu za Jamii, Ephraim Kwesigabo akizungumza na waandishi wa habari leo jijini Dar es Salaam.

WINGU LA HABARI

NA NOEL RUKANUGA, DAR ES SALAAM.

Mfumuko wa bei wa Taifa kwa mwezi februari mwaka huu umeongezeka hadi kufikia asilimia 4.1 ukilinganisha na asilimia 4 katika mwezi januari.

Akizungumza na waandishi wa habari leo jijini Dar es Salaam, Mkurugenzi wa Sensa ya Watu na Takwimu za Jamii, Ephraim Kwesigabo, amesema kuwa kuongezeka kwa mfumuko wa bei kwa mwezi februari mwaka huu kumechangiwa na kuongezeka kwa mfumuko wa bei kwa bidhaa zisizo za vyakula.

Amesema kuwa bidhaa hizo zisizo za vyakula zilizochangia kuongezeka kwa mfumuko wa bei ni pamoja na mkaa asilimia 17.6, gesi ya kupikia kwa asilimia 11.1, mafuta ya taa asilimia 9.9, petroli asilimia 13.1.

Bidhaa nyengine ni dizeli kwa asilimia 11.3, huduma za meno kwa asilimia 12.9, viatu asilimia 3.4, mavazi ya wanaume asilimia 3.4 huku mavazi ya wanawake yakiwa asilimia 3.8.

“Kuongezeka kwa mfumuko wa bei kwa mwezi februari mwaka huu kumechangiwa na bidhaa zisizo za vyakula ingawa kuna bidhaa chache za vyakula zilizochangia” amesema Kwesigabo.

Katika hatua nyengine amefafanua kuwa hali ya mfumuko wa bei kwa baadhi ya Nchi za Afrika Mashariki kwa mwezi februari mwaka huu umepungua hadi kufikia asilimia 2.1 kutoka asilimia 3 kwa nchi ya Uganda.

Kwa upande wa Kenya mfumuko wa bei umepungua hadi kufikia asilimia 4.46 kutoka asilimia asilimia 4.83.